Аб удзеле намесніка Міністра замежных спраў Беларусі Ю.Амбразевіча ў 77-й сесіі Генеральнай Асамблеі ААН (другі дзень)

7 снежня 2022 г. намеснік Міністра замежных спраў Рэспублікі Беларусь Юрый Амбразевіч прыняў удзел у арганізаваным на пляцоўцы ААН Рэспублікай Беларусь сумесна з Рэспублікай Філіпіны круглым стале па тэме «Сацыяльныя і прававыя праблемы, якія падсілкоўваюць гандаль жанчынамі і дзецьмі».

Сярод удзельнікаў мерапрыемства былі прадстаўнікі дзяржаў-членаў ААН з усіх рэгіёнаў свету, уключаючы членаў узначаленай Беларуссю ў ААН Групы сяброў, якія аб'ядналіся ў барацьбе з гандлем людзьмі, а таксама шырокае кола прадстаўнікоў акадэмічных колаў, міжнародных і няўрадавых арганізацый.

Выступоўцы адзначылі важны ўклад Беларусі ва ўмацаванне каардынацыі міжнародных намаганняў па барацьбе з гандлем людзьмі, а таксама ўказалі на шэраг практычных праблем і прапанавалі свае рашэнні для больш эфектыўнай сумеснай барацьбы з гэтай злачыннай практыкай.

На сустрэчы з намеснікам выканаўчага дырэктара Дзіцячага фонду ААН (ЮНІСЕФ) Карынай Хюльсхоф намеснік Міністра абмеркаваў пытанні бягучага і перспектыўнага супрацоўніцтва з ЮНІСЕФ, накіраванага на прыярытэтныя для дзяржавы сферы сацыяльнага развіцця, аховы здароўя і адукацыі, абароны дзяцей і падлеткаў, інклюзіі дзяцей з інваліднасцю. Намеснік Міністра заклікаў ЮНІСЕФ як адно з самых аўтарытэтных агенцтваў сістэмы ААН унесці свой уклад у ацэнку негатыўнага ўплыву заходніх эканамічных санкцый на намаганні, што робяцца дзяржавамі па дасягненні ЦУР.

Ю.Амбразевіч правёў сустрэчу з намеснікам Генеральнага сакратара ААН, кіраўніком Контртэрарыстычнага ўпраўлення Уладзімірам Варанковым. Суразмоўцы абмеркавалі актуальныя пытанні супрацоўніцтва Беларусі і Контртэрарыстычнага ўпраўлення ААН у галіне барацьбы з тэрарызмам, а таксама выклікі і пагрозы ў гэтай сферы, якія стаяць перад міжнароднай супольнасцю.

Намеснік Міністра адзначыў, што Беларусь прадоўжыць паслядоўна і эфектыўна рэагаваць на пагрозы, звязаныя з міжнародным тэрарызмам, у тым ліку ў рамках нарошчвання патэнцыялу ў сферы міжнароднай інфармацыйнай бяспекі і процідзеяння выкарыстанню інфармацыйна-камунікацыйных тэхналогій у тэрарыстычных і злачынных мэтах.

В.Варанкоў падкрэсліў канструктыўны характар кантактаў Беларусі з Контртэрарыстычным упраўленнем ААН. Падзякаваў Беларусі за паспяховую арганізацыю і правядзенне ў 2019 годзе ў Мінску сумесна з ААН Міжнароднай канферэнцыі высокага ўзроўню "Барацьба з тэрарызмам пры дапамозе інавацыйных падыходаў і выкарыстання новых тэхналогій". Выказаў надзею на працяг плённага супрацоўніцтва па контртэрарыстычнай тэматыцы.

Абазначыўшы прыярытэтныя напрамкі старшынства Беларусі ў АДКБ, Ю.Амбразевіч анансаваў планы па правядзенні ў г.Мінску міжнароднай канферэнцыі па тэматыцы еўразійскай бяспекі з акцэнтам на ўзаемазалежнасць устойлівага развіцця і ўстойлівай бяспекі.

версія для друку