Аб афіцыйным візіце Міністра замежных спраў Беларусі М.Рыжанкова ў Сірыю

Міністр замежных спраў Рэспублікі Беларусь Максім Рыжанкоў на чале беларускай дэлегацыі прыбыў у Сірыйскую Арабскую Рэспубліку з афіцыйным візітам. Адбылася сустрэча кіраўніка беларускага знешнепалітычнага ведамства з кіраўніком краіны Ахмедам аль-Шараа.

Падчас перагавораў, якія доўжыліся амаль дзве гадзіны, бакі абмеркавалі шырокае кола пытанняў і напрамкаў супрацоўніцтва, якое павінна садзейнічаць больш хуткаму аднаўленню Сірыі.

Па даручэнні Кіраўніка беларускай дзяржавы М.Рыжанкоў уручыў сірыйскаму лідэру сімвалічныя сертыфікаты на 50 аўтобусаў "МАЗ", перададзеных у дар сірыйскаму народу ад Прэзідэнта і народа Беларусі. На працягу бліжэйшых трох месяцаў яны будуць зроблены і адпраўлены ў Сірыю.

Адзначыўшы кампетэнцыі нашай краіны ў сферах прамысловасці і сельскай гаспадаркі, А.аль-Шараа падкрэсліў зацікаўленасць у развіцці супрацоўніцтва з Беларуссю, у аснове якога ляжаць даўнія сяброўскія сувязі беларускага і сірыйскага народаў.

А.аль-Шараа паведаміў, што сірыйскі бок мае намер рэалізаваць комплексную рэформу сферы транспарту, у рамках якой беларуская тэхніка, безумоўна, будзе запатрабавана. Была абмеркавана магчымасць арганізацыі ў Сірыі зборкі аўтобусаў, а таксама сельскагаспадарчай тэхнікі, рэалізацыя іншых праектаў.

М.Рыжанкоў зазначыў, што Мінск гатовы прадаўжаць гуманітарныя праграмы аздараўлення сірыйскіх дзяцей, якія рэалізуюцца пад патранажам Кіраўніка беларускай дзяржавы і асабліва зблізілі нашы народы за апошнія гады.

Абазначыўшы важную і канструктыўную ролю, якую сірыйская дыяспара ў Беларусі і беларускія грамадзяне ў Сірыі адыгрываюць для ўмацавання адносін, Міністр звярнуў увагу на магчымасць атрымання сірыйскімі студэнтамі якаснай адукацыі ў беларускіх ВНУ.

Бакі падрабязна абмеркавалі міжнародную сітуацыю і рэгіянальныя канфлікты, падкрэсліўшы агульную зацікаўленасць у іх больш хуткім урэгуляванні.

Міністр акцэнтаваў увагу на тым, што Беларусь нязменна выступае за захаванне суверэнітэту, незалежнасці і тэрытарыяльнай цэласнасці Сірыі ў міжнародна-прызнаных граніцах краіны.

М.Рыжанкоў падкрэсліў нашу гатоўнасць падтрымаць сірыйскі бок у яго рабоце на міжнародных пляцоўках па абароне гэтых прынцыпаў, а таксама зняццю санкцыйных абмежаванняў.

Кіраўнік Сірыі абазначыў зацікаўленасць у больш хуткім аднаўленні поўнафарматнай работы беларускага Пасольства ў Дамаску, для работы якога будуць створаны бяспечныя ўмовы.

Работа дэлегацыі будзе прадоўжана ў рамках сустрэч у сірыйскіх дзяржаўных органах.

версія для друку