Аб другім дні ўдзелу намесніка Міністра замежных спраў Беларусі І.Сякрэты ў сустрэчы Групы сяброў у абарону Статута ААН

15 красавіка 2025 г. намеснік Міністра замежных спраў Рэспублікі Беларусь Ігар Сякрэта працягнуў працу ў г.Маскве на Трэцяй сустрэчы нацыянальных каардынатараў дзяржаў-членаў Групы сяброў у абарону Статута ААН (ГСС).

У другі дзень мерапрыемства нацыянальныя каардынатары абмеркавалі такія актуальныя пытанні міжнароднага парадку дня, як праява неакаланіялізму ў міжнародных адносінах, прымяненне некаторымі краінамі аднабаковых прымусовых мер у абыход паўнамоцтваў Савета Бяспекі ААН супраць суверэнных і незалежных дзяржаў, перспектывы ўрэгулявання сітуацыі на Блізкім Усходзе. Таксама абмеркавана праграма мерапрыемстваў Групы сяброў на 2025 год.

Па выніках пасяджэння прыняты палітычныя дэкларацыі па ключавых пытаннях міжнароднага парадку дня.

На палях мерапрыемства І.Сякрэта правёў рабочыя сустрэчы з намеснікам Міністра замежных спраў Ірана Каземам Гарыбам-Абадзі, намеснікам Міністра замежных спраў Зімбабвэ Шэйлай Чыкома і Першым намеснікам Міністра замежных спраў Кубы Херарда Пеньялверам Парталем.

З іранскім бокам абмеркаваны сумесныя крокі па рэалізацыі дамоўленасцей, дасягнутых падчас візітаў Прэзідэнта Рэспублікі Беларусь у 2023 годзе, Прэм'ер-міністра Рэспублікі Беларусь у 2022 годзе і Міністра замежных спраў Рэспублікі Беларусь у 2022 годзе ў Іран. Разгледжаны пытанні падрыхтоўкі візітаў у адказ кіраўніцтва Ірана ў Беларусь. Увага нададзена рабоце сумеснай Беларуска-Іранскай камісіі па супрацоўніцтве ў галіне вышэйшай адукацыі, навукі і тэхналогій.

У фокусе гутаркі з намеснікам Міністра замежных спраў Зімбабвэ была рэалізацыя флагманскіх праектаў двухбаковага супрацоўніцтва, уключаючы Праграму механізацыі фермерскіх гаспадарак Зімбабвэ, якую асабіста патрануюць лідары дзвюх дзяржаў, стварэнне зборачных вытворчасцей беларускай тэхнікі, пастаўкі фармацэўтычных прэпаратаў у краіну, падрыхтоўку зімбабвійскіх студэнтаў для развіцця нацыянальнай навукі і тэхналогій.

З Першым намеснікам Міністра замежных спраў Кубы абмеркавана падрыхтоўка да чарговага пасяджэння Беларуска-Кубінскай сумеснай камісіі па гандлёва-эканамічным супрацоўніцтве, якое накіравана на выпрацоўку важкіх двухбаковых эканамічных праектаў. У кантэксце падрыхтоўкі візіту Міністра замежных спраў Рэспублікі Куба ў Рэспубліку Беларусь таксама разгледзелі супрацоўніцтва паміж дзвюма краінамі ў міжнародных арганізацыях.

версія для друку