Аб візіце Міністра замежных спраў Беларусі М.Рыжанкова ў Бразілію

Працягваецца візіт Міністра замежных спраў Рэспублікі Беларусь Максіма Рыжанкова ў Бразілію, які на даручэнне Кіраўніка дзяржавы прадстаўляе Рэспубліку Беларусь на XVII саміце БРІКС у г.Рыа-дэ-Жанэйра.

У сваім выступе перад кіраўнікамі дзяржаў і ўрадаў на пашыранай сесіі саміту на тэму «Навакольнае асяроддзе, COP-30 і глабальная ахова здароўя» кіраўнік беларускага знешнепалітычнага ведамства асабліва падкрэсліў неправамернасць і небяспеку эканамічных санкцый і аднабаковых прымусовых мер, якія ўводзяцца асобнымі дзяржавамі ва ўмовах, калі жыццю і здароўю насельніцтва пагражаюць эпідэміі, кліматычныя змены і іншыя негатыўныя трансгранічныя і глабальныя фактары.

На сустрэчы з кіраўніком расійскай дэлегацыі на саміце БРІКС Сяргеем Лаўровым бакі абмеркавалі далейшую каардынацыю работы знешнепалітычных ведамстваў у ААН, БРІКС, ШАС і на іншых шматбаковых пляцоўках, а таксама шэраг прадметных пытанняў двухбаковага палітычнага ўзаемадзеяння.

У рамках перамоў з Віцэ-прэзідэнтам Рэспублікі Уганда Джэсікай Роўз Алупа абмеркаваны ход рэалізацыі дамоўленасцей па выніках візіту Прэм'ер-міністра Рэспублікі Беларусь ва Уганду, які адбыўся ў лютым 2025 г., у такіх сферах узаемнай цікавасці, як прамысловасць, харчовая бяспека, энергетыка і ваенна-тэхнічнае супрацоўніцтва.

Бакі станоўча ахарактарызавалі актывізацыю двухбаковых кантактаў і вызначылі напрамкі далейшага развіцця міждзяржаўнага дыялогу. У якасці першачарговага кроку намечаны візіт Віцэ-прэзідэнта Уганды ў Беларусь з мэтай абмеркавання супрацоўніцтва ў сферы механізацыі сельскай гаспадаркі краіны і паставак беларускага харчавання.

На палях саміту таксама адбыліся сустрэчы Міністра замежных спраў Беларусі з Дзяржаўным міністрам ААЭ Ахмедам аль-Саегам, Прэм'ер-міністрам В'етнама Фам Мінь Цінем. Бакі прадметна абмеркавалі ход рэалізацыі міждзяржаўных дамоўленасцей, дасягнутых падчас афіцыйных візітаў у Беларусь і сустрэч з Прэзідэнтам нашай краіны.

У інтэрв'ю бразільскім выданням «O Mundo Diplomático» і «Brasília in Foco» па пытаннях прыярытэтаў шматбаковай палітыкі Рэспублікі Беларусь і двухбаковага супрацоўніцтва з Бразіліяй Максім Рыжанкоў падкрэсліў, што як краіна-партнёр БРІКС Беларусь цалкам падзяляе бачанне і падыходы арганізацыі, вызначаныя старшынствам Бразіліі, а таксама спадзяецца на найхутчэйшае паўнапраўнае членства ў гэтым аб'яднанні і далучэнне да яго асноўных структур, у тым ліку да Новага банка развіцця.

Таксама кіраўнік беларускага знешнепалітычнага ведамства даў ацэнку актуальнаму стану адносін паміж Беларуссю і Бразіліяй, адзначыўшы магчымыя кропкі росту ў эканамічнай сферы за кошт дыверсіфікацыі беларускіх паставак з улікам патрэб і запытаў бразільскага рынку.

версія для друку